「將自己嫁畀公司」~~~邊個天才諗出嚟嘅對白
返到公司幾乎全部女同事都講緊《不懂撒嬌的女人》呢套戲， 我就冇特登反TVB啲劇嘅， 不過聽到其中一句對白係話: 「將自己嫁畀公司， 咪仲有尊嚴。」我真係感到非常之反感， 直頭難聽過粗口。
可能係要加強戲劇效果啦， 不過諗到呢句對白嘅人， 都接近short上腦， 再撞正呢排新法定最低工資實施， 每小時34.5， 買唔到麥當勞巨無霸餐， 食翠華就更加冇可能， 諗多兩諗真係火都嚟。就算唔搵最低工資咁極端嘅例子去講， 用我哋呢啲坐office涼冷氣嘅一群， 我都覺得「將自己嫁畀公司」呢個諗法， 除咗智障同硬膠， 仲幾可憐。
一間公司， 有好多人， 咁就自然有好多變數， 你以為做得好穩定好開心咩? 只要老闆心念一轉， 又或者突然空降啲高層， 成個環境就會一夜之間轉變， 2016年10月至12月呢段期間， 蜂擁咁收到幾間公司員工嘅CV， 當中包括一間好出名嘅Online Shop、幾間銀行、某一兩間傳媒、兩至三間行中高檔路線嘅時裝品牌等等， 呢班求職者都係公司重組， 又或者上年業績唔好嘅犧牲品， 其中有幾個都係做咗7至10年以上， 結晒婚有晒仔女， 咁年紀當然都唔輕啦， 年尾流流炒人， 就算有肥雞餐食， 都真係好徬徨， 當中有啲人真係完全冇心理準備要再搵工， 畢竟都做咗好多年， 部份人直頭係心態上打算喺公司做到退休， 但最無奈嘅係， 佢哋喺呢個年紀先至認清楚， 公司嘅環境同變化， 單靠個人之力根本控制唔到， 亦冇得預計， 如果真係「將自己嫁畀公司」， 其實好可悲， 因為有啲Party你好想join， 人哋未必會預埋你玩。
Search